Ekki var minnst einu orði á þetta á MBL, og þetta var sett inn klukkan 4 um nótt á visir.is. Fréttin því horfin af forsíðu þegar flest fólk fór að bera sig eftir fréttum. Mér finnst það mætti fjalla meira um þetta, og einmitt leita eftir viðbrögðum frá Bjarna og Sigmundi.  

Fréttablaðið, 27. okt. 2009 04:00

Afþakkar þrjár milljónir á ári

Margrét tryggvadóttir Formaður Hreyfingarinnar afþakkar rúmar þrjár milljónir af skattpeningum á ári.

Margrét Tryggvadóttir, þingmaður og formaður Hreyfingarinnar, hefur afþakkað 260.000 króna álag ofan á þingfararkaup sitt. Þetta eru 3.120.000 krónur á ári.

Þetta álag, sem nemur fimmtíu prósentum af þingfararkaupi, er hluti af launakjörum þeirra þingmanna sem einnig eru formenn stjórnmálaflokka. Þingfararkaupið er 520.000 krónur. Margrét segir að ákvörðunin sé tekin í anda Hreyfingarinnar. „Við höfum flatan strúktúr og ætlum að hafa þetta embætti róterandi. Eins og ástandið er í þjóðfélaginu finnst okkur ekki rétt að þiggja þetta." Hún eigi ekki meiri rétt á fénu en samflokksmenn hennar.

„Við erum ein liðsheild og höfnum leiðtogadýrkun. Þetta er þáttur í því." Margrét segist aðspurð ekki sjá eftir aurunum: „Ég skrimti alveg."
Samkvæmt reglum um þingfararkostnað mega formenn flokka sem hafa þrjá þingmenn eða fleiri fá álagið greitt, að því gefnu að formennirnir séu ekki jafnframt ráðherrar. Því eiga tveir aðrir þingmenn rétt á álaginu, þeir Bjarni Benediktsson, formaður Sjálfstæðisflokks, og Sigmundur Davíð Gunnlaugsson, formaður Framsóknar. Ekki náðist í þá í gær.- kóþ

Íbúar í 3. hverfi eru hvattir til að mæta að gönguljósum á Miklubraut gengt Reykjahlíð / Kjarvalsstöðum kl. 16:30 á miðvikudaginn.

Mér er ljúft og skylt að koma þessum boðum áleiðis.  

Sýndu tillitsemi – Hér býr fólk – Minni hávaða – Betra loft

Íbúar í Hlíðum boða til aðgerða á Miklubrautfimmtudaginn 21.október kl. 16:30

Íbúar í Hlíðum vilja draga andann rólegir í sínu eigin hverfi og hlífa börnunum við mengunaráhrifum mikillar umferðar á Miklubraut.  Íbúasamtök Hlíða og Norðurmýrar boða til friðsamra aðgerða á sjálfri Miklubraut til að vekja fólk til vitundar um skert lífsgæði Hlíðabúa vegna hávaða - og svifryksmengunar.

Miðvikudaginn 21. október kl. 17.00 boðar Hverfisráð Hlíða til Samgönguþings á Kjarvalsstöðum.  Þing þetta er opið öllum íbúum Hlíða sem fyrst hverfa ætlar að móta samgöngustefnu fyrir hverfið.

Íbúasamtök 3. hverfis - Hlíðar, Holt og Norðurmýri fagna þessu framtaki og hafa skipulagt aðgerðir í tilefni af þessu. Íbúar ætla að safnast saman kl. 16.30 beggja vegna Miklubrautar við gangbrautina við Reykjahlíð á móts við Miklatún, þar sem dreift verður rykgrímum. Kl. 16:45 munum þeir ganga nokkrum sinnum í rólegheitum yfir Miklubrautina með stóran borða sem meðal annars á stendur: Sýndu tillitsemi – Hér býr fólk – Minni hávaða – Betra loft. Borði þessi var notaður í sams konar aðgerðum fyrir 12 árum af íbúum hér í hverfinu og var gefinn íbúasamtökunum fyrir ári síðan. Áhyggjur íbúa þá og nú eru hinar sömu, enda eykst umferð á Miklubraut ár frá ári og svifryksmengun fer ítrekað yfir heilsufarsmörk í Hlíðum.

Stjórn Íbúasamtaka 3. hverfis býður öllum íbúum Hlíða, ungum, gömlum, fjölskyldum og einstaklingum að taka þátt í þessari friðsamlegu athöfn.  Við viljum vekja okkur sjálf og aðra til vitundar um það að það er hægt hafa mikil áhrif á loftgæði borgarinnar með t.d. að ganga og hjóla meira, aka hægar og hætta notkun nagladekkja. Stjórn samtakanna  krefst einnig svara frá borgaryfirvöldum hvaða úrræði þau hafi til að tryggja það að að mengunin við Miklubraut fari ekki oftar yfir heilsufarsmörk á árinu enda hefur fjöldi skipta nú þegar fyllt leyfilegan kvóta samkvæmt reglugerð. Íbúasamtökin hvetja fólk til að mæta með heyrnarhlífar, hjálma og mótmælaspjöld. Fulltrúar frá íbúasamtökum munu stjórna aðgerðum, dreifa rykgrímum til gangandi fólks og bílstjóra og kalla til fjölmiðla.

Stöndum, saman, stöðvum stórfljót bíla á Miklubraut skamma stund
– og drögum andann djúpt í Hlíðum.

Nokkrar staðreyndir:

• Þann 27. september 2009 hafði svifryk í Hlíðum farið 12 sinnum yfir heilsufarsmörk af þeim 12 sem leyfilegt er samkvæmt reglugerð 251/2002. Hvað á að gera til að koma í veg fyrir 13. skiptið?
• Meirihluti íbúa í Hlíðum býr innan hættulegasta 200 m áhrifasvæðis af völdum NO2 og svifryks.
•  5 af 7 leiksskólum og allir barnaskólar hverfisins eru einnig á þessu mesta áhrifasvæði umferðarmengunar
• Svifryksmengun hefur óæskileg áhrif meðal annars á lungnaþroska barna og astma
• Talið er að tengsl séu milli rykmengunar og lungnakrabbameins og hjarta- og æðasjúkdóma
• Fjöldi gagna um heilsuspillandi áhrif svifryks og baráttu íbúasamtaka III. hverfis fyrir bættum loftgæðum er að finna á heimasíðu samtakanna www.hlidar.com.

Eftir þetta hvetjum við íbúa til að fjölmenna á Samgönguþing Hlíða á Kjarvalsstöðum sem hefst kl. 17 og stendur til kl. 19!

 

Hér að neðan eur úrklippur úr Morgunblaðinu sú fyrri frá 24. maí 1997 og hin frá 18. janúar 1997. Með því að ýta á myndirnar, opnast þær í nýjum glugga í PDF til að skoða nánar. Myndirnar eru teknar af vefnum www.timarit.is.

Menningar- og sögutengd ganga um Hraun

Menningar- og sögutengd ganga í boði Grindavíkurbæjar og Saltfiskssetursins verður sunnudaginn 11. október og hefst kl. 13:00. Gangan hefst við Hraun austan Þórkötlustaðahverfis með vígslu á sjöunda söguskiltinu sem sett er upp í Grindavík.

Genginn verður hringur m.a. að: fiskgörðum í Slokahrauni, strandstað Cap Fagnets, Tyrkjadys og hinum forna kirkjustað. Ómar Smári og Sigrún Franklín sjá um fræðsluna. Gangan tekur um einn til tvo klukkutíma með fræðslustoppum. Gengið í hrauni og grasi. Gangan er liður í viðburða- og menningardagskrá Saltfisksetursins og Grindavíkurbæjar. Í lok göngu verður heitt á könnunni. Allir eru velkomnir.

Sigrún Jónsd. Franklín, verkefnastjóri, [e-mail] gsm 6918828 www.sjfmenningarmidlun.is

skólaður í pólitík?

"Við héldum að hann væri orðinn skólaðri í pólitík en þetta,“ segir Sigmundur."

Mér sýnist Ögmundur fylgja sannfæringu sinni, og hvarvetna uppskera lof fyrir það. Ber það vott um barnaskap í pólitík? Ef hann væri skólaðri í pólitík, væri þá eðlilegra að ganga gegn sannfæringu sinni? Er það þá gott að vera skólaðri í pólitík? Sigmundur er líklegast útlærður sem sést ágætlega á lögheimiliruglinu.

Stendur og fellur með VG

Yfirlýsing frá greiðsluverkfallsstjórn HH

Fannst rétt að leggja mitt af mörkum við að koma þessum skilaboðum áleiðis. Það er nú reyndar líklegt að ég fari tilneyddur í greiðsluverkfall, þar sem það er engin leið fyrir mig hvort eð er að borga af öllu þessi mánaðarmótin. Mér er það þá sönn ánægja að láta Kaupþing sitja á hakanum og láta fjölskylduna í forgang.

 

*Yfirlýsing frá greiðsluverkfallsstjórn HH*
 ***************
Óljós úrræði til lausnar á skuldavanda heimilanna sem félagsmálaráðherra
hefur kynnt skömmu fyrir boðað greiðsluverkfall breyta ekki forsendum
verkfallsins. Enn er hækkað flækjustig  á útreikningum lána og
endurgreiðslna og lengt í hengingaról heimilanna. Biðlán verður látið hvíla
 eins og farg á skuldugum heimilum í áratugi og gerir húseignir
óseljanlegar. Þannig er útilokað fyrir fjölskyldur að gera áætlanir fram í
tímann eða bregðast við breyttum högum.

Kynning stjórnvalda á fyrirhuguðum úrræðum hefur verið mjög ótrúverðug svo
ekki sé meira sagt. Fullyrðingar um að tillögurnar hafi verið unnar í
samráði við Hagsmunasamtök heimilanna eru ósannar og virðast settar fram til
að blekkja almenning og grafa undan greiðsluverkfallinu.
Greiðsluverkfallsstjórn Hagsmunasamtaka heimilanna krefst þess að stjórnvöld
og lánastofnanir gangi til viðræðna við samtökin um kröfur þeirra.
Greiðsluverkfallsstjórn Hagsmunasamtaka heimilanna  hvetur til  almennrar
samstöðu um þátttöku í greiðsluverkfallinu 1. til 15. október til að fylgja
kröfunum eftir.

30. september 2009
Greiðsluverkfallsstjórn HH
****************
Greiðsluverkfallsstjórnin vill vekja athygli á könnun á www.visir.is.
Smellið hér til að fara beint í könnunina:
http://visir.is/section/frettir&template=konnun&teg=r

Virki ekki að smella er hægt að fara bara beint inn á vefinn www.visir.is og
finna þar sem segir vinstra megin á síðunni "Reykjavík síðdegis spyr".

Stjórn HH vill vekja athygli á eftirfarandi tilmælum HH sem koma einnig fram
á heimasíðunni www.heimilin.is

Eru starfsmenn innheimtudeilda persónulega ábyrgir?

Hagsmunasamtök heimilanna vilja beina þeim tilmælum til þeirra sem verða
fyrir barðinu á innheimtuaðgerðum lánastofnana að halda til haga nöfnum
þeirra starfmanna sem þeir eiga samskipti við. Hlutaðeigandi kunna að bera
lagalega ábyrgð á þeim skaða sem innheimtuaðgerðir á ólögmætum lánaskilmálum
kunna að valda. Upplýsingar um forsendubrest og réttaróvissu lánasamninga
eru nú á allra vitorði og vart hægt að skýla sér á bak við fáfræði í þeim
efnum.

Stjórn Hagsmunasamtaka heimilanna

Hagsmunasamtök heimilanna
www.heimilin.is
[e-mail]

af hverju ekki sameiginlegt mat?

hvað eru allir svona hræddir við?  á bara að vaða áfram og skemma allt og hugsa ekkert um umhverfið? síðan hvenær eru allir svona hrifnir af álverum?

Skilja ekki ákvörðun ráðherra

Aldarafmæli gömlu Grindavíkurkirkju

Í tilefni aldarafmælis gömlu Grindavíkurkirkju verður kirkjuganga laugardaginn 26. september. Mæting er kl. 11 við kirkjuna, þaðan verður ekið með einkabílum að Staðarkirkjugarði. Gengin verður kirkjugatan frá Stað að gömlu Grindavíkurkirkju í Járngerðarstaðahverfi. Gengið verður í grasi og hrauni. Gangan tekur um 2 - 3 tíma með fræðslustoppum. Kirkjan var vígð þennan dag árið 1909. Hún var afhelguð 1982 og síðan hefur verið m.a. barnavistun og ýmiss félagsstarfsemi í húsinu.

Söguskilti verður sett upp við kirkjuna. Myndir verða af gömlum kirkjumunum og heitt á könnunni í tilefni dagsins. Allir eru velkomnir. Gangan er liður í viðburða- og menningardagskrá Saltfisksetursins og Grindavíkurbæjar.

Ómar Smári göngurgarpur úr gönguhópnum FERLIR mun leiða gönguna.

www.ferlir.is

ég mæli með að fólk líti á vefsíðuna www.ferlir.is þar sem ötullega hefur verið skrifað um náttúruna á Reykjanesinu. Svæðið nýtur sívaxandi vinsælda sem útivistarsvæði, förum ekki að kaffæra því með raflínum og tilheyrandi vegagerð. Ég tek mér leyfi til að afrita hingað eina grein af síðunni þar sem fjallað er um svæðið almennt.

 

Reykjanesskaginn - einstök útivistarperla

Nútíminn hefur vaxandi áhuga á umhverfi og umhverfisvernd, útivist og ódýrri heilsueflingu, ekki síst nú á tímum hækkandi eldsneytisverðs og kröfu um ráðdeild. En hvað með söguna, varðveislu og nýtingu hinna áþreifanlegu minja?

Á Reykjanesskaganum býr yfir helmingur Íslendinga, á einu fjölbreyttasta útivistarsvæði landsins, en jafnframt því vannýttasta. Á svæðinu er mikill fjöldi sögulegra minja er enduspegla búsetu- og atvinnuþróun þess frá upphafi landnáms. Lítill hluti þeirra hefur verið skráður og hlutfallslega fáar áhugaverðar minjar hafa beinlínis verið varðveittar með markvissum aðgerðum eða áætlunum um að gera þær aðgengilegar fólki. Í minjarnar má lesa, líkt og á handritin, söguna frá upphafi, stig af stigi, svo og menningu hvers tíma. Tóftir gamalla bæja, sjóbúðir, sel og selstöður, stekkir, kvíar, nátthagar, hleðslur, fjárborgir og hellar, fjárskjól, þjóðleiðir, mörk og merkingar auk dysja, brunna, flórgólfa, nausta og vara eru minjar genginna kynslóða. Hvert sem farið er liggur sagan geymd - en alls ekki öllum gleymd. Ótaldar eru náttúruminjarnar, sem margar hverjar eiga hvergi sína líka, faldar í hraunum, hlíðum, dölum, fjöllum, hálsum og við læki og vötn.
Lítill áhugi virðist hafa verið fyrir því að rannsaka og/eða endurgera valdar minjar á svæðinu, reisa tilgátumannvirki eða gera söguna aðgengilegri og nýtanlegri en verið hefur. Og það þrátt fyrir að nýyrði eins og "heilstætt búskaparlandslag", "menningarlandslag" og "sögutengd ferðaþjónusta" hafi hvergi frjósamari jarðveg en einmitt þar. 
Allir hafa í raun gott af því að vita af uppsprettunni og gera sér grein fyrir hvar rætur þeirra hafa fengið vökvun um langan tíma, hvaðan droparnir komu og hvernig þeir viðhéldu gróðurlífinu. Uppruninn skiptir máli - hver sem hann er. Þangað sækir fólk næringuna. Sumt af því virðist kannski við fyrstu sýn ekkert sérstaklega burðugt eða til þess fallið að vekja stolt, en þegar betur er að gáð verður raunin önnur - allt önnur. Hún gefur fullt tilefni til að nýta blómin - arfinn - okkur sjálfum og komandi kynslóðum til heilla.

Minjasagan lýsir vel einkennum þjóðarinnar og hvernig hún nýtti landkosti og efni öðruvísi en aðrar þjóðir, hvernig dreifing útvegsbændabyggðarinnar var með ströndum landsins, nýting innlandsins og önnur hagnýting landsgæðanna. Hver var t.a.m. ástæðan fyrir því að landsmenn bjuggu í "moldarhólum" og hlöðnum byrgjum langt fram eftir öldum á meðan fólk víðast hvar annars staðar í Evrópu hafði búið í steinhúsum um árþúsundir? Á Reykjanesi má sjá ástæður þessa og þar er einnig hægt að sjá bæði þróun híbýlanna hér á landi og upphaf steinhúsabygginganna á 19. öldinni - ef vel er að gáð. Fyrsti hlaðni steinviti landsins var reistur á Valahnjúk á Reykjanesi og svo mætti lengi telja. Um hann og ótalmargt annað, bæði fyrst og merkilegast, er fjallað á vefsíðu þessari.

Algengara er í seinni tíð að hópar eða jafnvel vinnustaðafélagar taki sig saman og skipuleggi stuttar gönguferðir starfsmanna. Um er að ræða ódýrt en hollt ráð til að bæta heilsu og líðan þeirra, sem hlut eiga að máli, en jafnframt kjörið tækifæri til að kynnast sögu, minjum og umhverfi svæðisins. Stutt er á þau mið sem og allt, sem til þarf. Frá Reykjavíkursvæðinu tekur t.a.m. ekki nema uþ.b. stundarfjórðung að komast á flest áhugaverðustu svæði Reykjanessins. 
Ástæða er til að hvetja fólk til að hreyfa sig umfram hið venjubundna og að áhugasamt fólki nýti sér nálægðina til að kynna sér hið margvíslega sem umhverfið og svæðið allt hefur upp á að bjóða.

Gönguhópurinn FERLIR hefur nýtt undanfarin ár til að ganga um einstök svæði Reykjanesskagans. Upphaflega var markmiðið að fara eitt hundrað ferðir um svæðið til að skoða það helsta, en þrátt fyrir um 1400 ferðir, sem að jafnaði hafa tekið 1-5 klst hver, eru stór svæði enn ógengin og óskoðuð.
Hópurinn hefur á ferðum sínum um Reykjanesskagann leitað til fólks, sem fætt er eða uppalið á hinum ýmsu svæðahlutum. Hvarvetna hefur hópnum verið vel tekið og fólk verið ótrúlega áhugasamt og viljugt að miðla af fróðleik sínum og þekkingu. Berlega hefur komið í ljós að þetta fólk býr yfir bæði mikilli og ómetanlegri vitneskju um minjar og sögu staðanna. Þessu fólki fer því miður fækkandi og líklega kemur að því að margt af því, sem vitneskja er um í dag, hverfi með tímanum - nema eitthvað verði að gert til að varðveita það (umfram það ágæta sem þegar hefur verið gert). 

Komið hefur á óvart hversu ótrúlega mikið og margt Reykjanesskagasvæðið, bæði ofan og utan höfuðborgarsvæðisins, hefur útivistarfólki eða öðru áhugasömu fólki upp á að bjóða - fólki sem nennir að leggja svolítið á sig eða hefur áhuga á að fræðast, hreyfa sig eða skoða sig um.

Í ferðum FERLIRs hefur oft verið um að ræða gönguferðir utan alfararleiða og þá tækifærið verið notað og skoðaðar jarðmyndanir á svæðinu, flóra, fána, fjöll, dalir, hæðir og lægðir, hellar, minjar, s.s. sel, fjárskjól og brunnar, nátthagar, gjár, gamlar þjóðleiðir, vötn, námur, hverir, brunnar, flugvélaflök, eldgígar, eldborgir, vitar, hleðslur og skógræktir. Jafnframt hefur verið reynt að setja sig í spor og kynnast lífi fólks og aðstæðum þess hér á öldum áður, breytingum á staðháttum og þróun frá einum tíma til annars. Sumir staðanna, sem gengið hefur verið á, eru mjög viðkvæmir fyrir átroðningi og því kannski ekki beinlínis æskilegt að hvetja margt fólk til að fara þangað, en ef það er gert þarf ávallt að gæta þess að fara um með varkárni og af tillitssemi.

Til gaman má geta þess að þátttakendur hafa fram að þessu skoðað um tvö hundruð og fimmtíu selstöður á svæðinu frá Hvalfjarðarbotni að Reykjanestá, auk allra mannvirkjanna, sem þeim fylgja, s.s. stekkir, kvíar, fjárskjól, gerði, brunnar, vatnsstæði og leiðir, gamlar hlaðnar réttir, um 600 hella og nafngreinda skúta, fjölmargar gamlar leiðir, gamla hlaðna brunna, letursteina og áletranir, vörður, sem tengdar eru einhverjum sögum, hlaðnar refagildrur sem og margt annað er ætti að þykja áhugavert.
Í ljós hefur komið að þótt einhver áhugasamur vilji kynna sér tiltekinn hluta svæðisins af einhverju viti, leita uppi allar minjar og fá samhengi í nýtingu þeirra, getur það tekið hann langan tíma.

Mikilvægt er að alþingismenn, sveitarstjórnarfólk og ferðaþjónustuaðilar geri sér grein fyrir verðmæti og möguleikum svæðins, tjái sig jákvætt um það og af þekkingu, efli tiltrú annarra og skapi þannig grundvöll af enn fjölþættari nýtingu þess en verið hefur hingað til.

Mest um verð er þó sú innsýn, sem þátttakendur hafa öðlast á landssvæðið, breytingar á því í gegnum aldirnar, aðstæður fólksins og dugnað þess við takmarkaða möguleika og erfiðan kost. Þetta fólk á skilið mikla virðingu frá okkur afkomendunum. Mikilvægt er og að láta vitundina um það lifa áfram á meðal þeirra sem eiga að erfa landið. Þá er ekki síður mikilvægt að umgangast landið af varfærni og virðingu.

http://www.ferlir.is

 

Verulega neikvæð áhrif vegna lagningar Suðvesturlína

Þá og nú #2 - Menntaskólinn í Reykjavík

Menntaskólinn í Reykjavík. Póstkort frá 1923. Nýja myndin er tekin úti á miðri götu en virðist vera á sama stað. Þó nær trappan næst ljósmyndaranum grunsamlega langt út á Lækjargötu á gömlu myndinni. Hafa ber í huga að þá var Lækjargatan ekki fjórar akreinar.

Hér má svo skoða þessar tvær myndir á skemmtilegan máta, með því að "skafa" gömlu myndina burt og birta þá nýju. Það virkar hinsvegar bara í Internet Explorer held ég.

Minni á ....

þetta:

 

Hjörleifur Guttormsson

9. júlí 2008

Þingvellir og sumarbústaðir í þjóðgarði Birtist sem blogg á Mbl.is 9. júlí 2008 Árið 1988, 27. maí, samþykkti Þingvallanefnd skipuð Þórarni Sigurjónssyni, Þorsteini Pálssyni og undirrituðum Stefnumörkun í skipulagsmálum þjóðgarðsins. Þar segir í lið 3.24: Sumarbústaðir innan þjóðgarðsins: "Samningar um sumarbústaði í þjóðgarðinum renna út á næstu árum. Þessir samningar verða ekki framlengdir, nema þá til 10 ára í senn. Ákvæði verða sett í samninga, m.a. um hámarksstærðir húsa, frjálsa og hindrunarlausa umferð, forkaupsrétt og kauprétt, þannig að þjóðgarðurinn geti smám saman eignast þau mannvirki sem þörf er talin á vegna skipulagsins. Girðingar verða ekki leyfðar umhverfis hvern sumarbústað enda verði allir bústaðir innan einnar girðingar. Gert verður deiliskipulag af sumarbústaðasvæðinu." Eðilegt er að Þingvallanefnd upplýsi nákvæmlega hvað gert hefur verið í sumarbústaðamálum þjóðgarðsins eftir að þessi stefnumörkun var samþykkt en með henni var snúið frá fyrri stefnu, t.d. voru samningar um bústaði í upphafi gerðir til allt að 50 ára. Undirritaður telur, nú eins og þegar stefnan var mótuð 1988, að allir sumarbústaðir einkaaðila undir Hallinum í landi þjóðgarðsins, þ.e. á svæðinu sunnan Valhallar meðfram Þingvallavatni eigi að víkja. Með því einu er unnt að bæta fyrir það hneyksli sem fólst í úthlutun sumarbústaðalóða í þjóðgarðslandinu á tímabilinu frá 1930 til 1970. Svo virðist sem þetta hafi ekki gengið eftir. Eðlilegt er að krefjast þess að Þingvallanefnd geri nú hreint fyrir sínum dyrum og marki stefnu sem samræmist lögum um þjóðgarðinn en samkvæmt þeim "skulu Þingvellir við Öxará og grenndin þar vera friðlýstur helgistaður allra Íslendinga." (Lög nr. 59/1928).   Hjörleifur Guttormsson

Hálfkaraðar glæsihallir