[MP3] Spaghetti Vabune!

Spaghetti Vabune! er stórkostleg japönsk hljómsveit sem gerir út á gítarpopp í hæsta gæðaflokki, enda heitir nýjasta platan þeirra Guitar Pop Grand Prix, en hún kom út árið 2006 hjá Bluebadge label í Japan. Hana hef ég ekki eignast en ég náði mér í plötuna Summer Vacation, Sunset Vehicle frá árinu 2003 og hún er svo að segja skotheld út í gegn.

Ég taldi við fyrstu hlustun að allt væri sungið á japönsku, en fór svo að rýna í textablaðið. Meiri hluti laganna er þá á ensku, en þau syngja með svo svakalega þykkum hreim að það skilst bara stöku orð, og það bara þegar maður les textann með. Ensku textarnir eru svo alveg arfaslakur leirburður og leiða má að því getur að þau skilji ekki orð í ensku, mér dettur helst í hug þau hafi þýtt japanska textann sinn með þýðingartóli eins og babelfish.altavista.com, og svo sungið það sem kom út án þess að vita hvernig framburðurinn ætti að vera.

Það breytir því hinsvegar ekki að þetta er alveg sérdeilis grípandi popp.

Afar erfitt reynist að finna eitthvað gáfulegt um sveitina á netinu, það er allt á japönsku. Vefsíðan þeirra er skemmtileg að því leitinu að "menu" hlutinn er á ensku s.s. "News", "About SV" og "Link", en svo er allt "contentið" á japönsku, og því skiptir engu máli þótt maður geti vafrað á réttan hluta vefsins. En nóg um það, hlustið á lagið "Chokolate Song" sem nota bene er sungið á Japönsku að mestu leiti, utan einstaka orð. Fyrsta setningin í textanum er til að mynda "It's sunnyday" og stuttu síðar má með lagni greina "shining star".

[MP3] Spaghetti Vabune - Chocolate Song

Myndband við lagið "Prime Plumstar" sem er líklegast af 2006 plötunni. Ég veit ekki hvort það er á ensku eða japönsku:

Bónusvídeó: "Chocolate Song":

 

[Myspace]