[MP3] Singapore Sling

Þótt ég hafi gaman af barnalegri popptónlist þá er ekki bara gleði og hamingja á þessu mp3 bloggi. Ég er nefninlega líka veikur fyrir ærandi hávaða og yfirþyrmandi brotsjó af drynjandi gítörum á kafi í effektum. Singapore Sling er líklegast, eða öllu heldur án efa, besta slíka hljómsveitin hér á landi, og þau gefa á næstunni út fjögurra laga smáskífu sem fylgja mun næsta tölublaði Grapevine.

Skífan sú mun innihalda tvö ný lög, og tvær endurhljóðblandanir, aðra unna af hljómsveitinni Bacon sem inniheldur fyrrum meðlimi Stjörnukisa, og hin af Evil Madness sem skartar m.a. Jóhanni Jóhannssyni sem gerir núna gjarnan íðilfagra kvikmynda- og leikhústónlist en á sér þeldökka fortíð úr hávaðrokksveitinni Daisy Hill Puppy Farm. 

Þess fyrir utan er Singapore Sling að leggja lokahönd á næstu breiðskífu sem væntanlega lítur dagsins ljós í september.

Hljómsveitin var stofnuð árið 2000 af þeim Henrik og Einari, og fyrsta plata þeirra, The Curse of Singapore Sling, kom út árið 2002. Henrik var áður stofnmeðlimur Bang Gang ásamt Barða nokkrum Jóhannssyni. Bjössi trommari gerði áður garðinn frægan í PPPönk þar sem hann lék á bassa, en Ester sem plokkar bassann í Sling var í Kolrössu Krókríðandi.

Hlýðum á nokkur tóndæmi þar til nýja efnið kemur út. Af þessum lögum er ég lang hrifnastur af Guiding Light, og mæli með að stilla hátt!

[MP3] Singapore Sling - Guiding Light
[MP3] Singapore Sling - Overdriver
[MP3] Singapore Sling - Listen
[MP3] Singapore Sling - Life is killing my Rock 'n' Roll