Til sölu!

1. A Series of Unfortunate Events. Öll serían, 13 bækur, þar af eru 3 sett af þremur bókum í sérlega fallegum slip-case umbúðum. Óhætt er að segja að þessar mögnuðu sögur Lemony Snicket hafi slegið rækilega í gegn, og ekki alls fyrir löngu var gerð bíómynd eftir fyrstu þremur bókunum með Jim Carrey í hlutverki vonda gaursins. Þessar útgáfur eru allar á ensku, og vel með farnar. Raunvirði út úr búð myndi ég skjóta á að væri á bilinu 15-20.000 kr. Allur pakkinn fæst hér á 10.000 kr.

2. Heildarútgáfa John Steinbeck frá Book of the Month Club. Grapes of Wrath, Winter of our Discontent, Tortilla Flat, Of Mice and Men, The Long Walley, East of Eden, Travels with Charley. Fallegar og vel með farnar útgáfur. Ekki hef ég grun um hvað ég borgaði fyrir þetta á sínum tíma, en finnst sjálfsagt að fá svona 5000 kr (ódýrt!) fyrir allt heila klabbið.

Þess má svo til gamans geta að Stephin Merrit, forsprakki Magnetic Fields, samdi lagið "Scream and run away" fyrir A Series of Unfortunate Events, undir heitinu The Baudelaire Memorial Orchestra. Hann samdi svo lög sem heyra má á hljóðbókarútgáfunum undir heitinu The Gothic Archies. "Scream and run away" má heyra og melta hér, meðan þið hugleiðið þessi kostaboð.

[MP3] The Gothic Archies - Scream and run away

[MP3] Los Punsetes

Höldum okkur aðeins við Spán enn um sinn. Los Punsetes var stofnuð í Madríd árið 2004, og þar reyndar þrýtur að mestu þekkingu mína, enda er allt sem ég finn um sveitina á spænsku. Nema hvað, þau lög sem hér má finna minna annars vegar á þunglyndið í Stereolab, og hinsvegar á spastískt breskt pönk eins og Gang of Four. Vel þess virði að tékka á, og þess má geta að seinasta platan þeirra er fáanleg í heilu lagi og algerlega ókeypis á vefnum þeirra.

[MP3] Los Punsetes - Dos Policías
[MP3] Los Punsetes - Fondo de Armario

[lospunsetes.com]

 

[MP3] Tindersticks

Valíum töffararnir í Tindersticks verða sannarlega hvalreki á fjörur íslenskra tónlistarunnenda en þeir ku eiga að leika á NASA þann 11. september næstkomandi. "samtals hefur sveitin gefið út hljómdiska" segir í frétt á mbl.is, og það er ekki fjarri lagi. Mér reiknast svo til að eiginlegar breiðskífur sveitarinnar séu 7 talsins, en sú seinasta kom út núna nýverið og ber heitið The Hungry Saw.

Ég tók mig til og gróf upp MP3 víðsvegar, það er því ekki við mig að sakast sérstaklega að þetta sé til á MP3 á netinu. Ég skellti þessu hinsvegar inn á mitt vefsvæði hérlendis svo þetta sé ekki að hökta endalaust á útlandatengingu.

Persónulega mæli ég með "Tiny Tears", en allt er þetta ljómandi gott kertaljósapopp. Ég set svo spurningamerki við það að halda tónleikana á NASA, en ég hef á tilfinningunni að þetta band færi miklu betur í Fríkirkjunni, allavegana miðað við rólegheitin í þessum lögum. Ég hef hinsvegar aldrei séð þá á tónleikum svo hvað veit ég.

[MP3] Tindersticks - She's Gone (af Tindersticks, 1995)
[MP3] Tindersticks - Tiny Tears (af sömu plötu)
[MP3] Tindersticks - Waiting for the Moon (af Waiting for the Moon, 2003)
[MP3] Tindersticks - 4.48 Psychosis (af sömu plötu)
[MP3] Tindersticks - The Turns We Took (af The Hungry Saw, 2008)
[MP3] Tindersticks - All The Love (af sömu plötu)

[Myspace]

[MP3] Plata frá Secret Shine

Skóglápssveitin Secret Shine frá Bristol gaf nýverið út aðra breiðskífu sína. All Of The Stars heitir gripurinn en fyrri platan þeirra kom út fyrir hvorki meira né minna en 15 árum síðan. Þau hafa ekki setið auðum höndum upp á síðkastið, tvær EP plötur hafa komið út og sveitin spilaði á SXSW hátíðinni í Texas nú á dögunum við góðar undirtektir. Íslenskir skógláparar geta glaðst því allar líkur eru á að bandið komi við á klakanum í haust.

Það sem ég hef heyrt af nýju skífunni hljómar mjög vel, nokkur lög fann ég á bloggum víðsvegar og hérna er eitt þeirra:

[MP3] Secret Shine - Know

[Myspace]

[MP3] TCR

Spánn er mér hugleikinn þessa dagana, og spænska finnst mér sérdeilis fallegt tungumál, sér í lagi sungið. Mér finnst líka oft rosalega gaman að tónlist þegar ég skil ekki orð sem er verið að synga, enda skil ég varla stakt orð í spænsku, og varð það ítrekað á að missa út úr mér "mersí" í stað "gracias" þegar ég verslaði mér eitthvað þar ytra. Eins og ég kunni eitthvað meira í frönsku, sem ég geri ekki.

TCR var hljómsveit frá Barcelona sem gaf út tvær breiðskífur, smekkfullar af hressu gítarpoppi, á sínum stutta líftíma. Fátt er gáfulegt að finna um þau á netinu, en spilagleði þeirra þykir minna um margt á Buzzcocks, einskonar poppskotið pönk. Eða öfugt. Ég hef hinsvegar ekki grun um hvað þau eru að syngja, en grípandi er það.

Hérna er lag af seinni breiðskífu þeirra, en hún bar heitið Paro, Siesta, Días de Fiesta.

 

[MP3] TCR - De la A a la Z (sem gæti útlagst sem "Frá A til Z")

[MP3] Juniper Moon

Þá er maður að jafna sig eftir árshátíðarferð Vodafone til Alicante. Þar vantaði nú ekki fjörið, dansað uppi á borðum langt fram eftir nóttu. Gist var á 5 stjörnu hóteli með risa golfvelli, og páfuglar spígsporuðu um garðinn og vöktu alla klukkan 7 á morgnana. Hótelgarðurinn var reyndar fallegasti hluti borgarinnar því ekki er Alicante mikið fyrir augað, allstaðar eru hálfkaraðar vegaframkvæmdir en allan tímann sá ég engann í raun vinna við þær.

Ég er ekki týpan sem liggur og bakast á sólarströnd og átti betur við mig að labba um og skoða forláta kastalarústir sem þarna eru á hæð einni, en kastalinn ku upphaflega vera byggður af Márum fyrir hartnær þúsund árum síðan. Annars var allt sem ég sá af Spáni frekar skrælnað og kyrkingslegt eitthvað. Ólíklegt þykir mér svo að margt merkilegra hljómsveita eigi uppruna sinn á Alicante.

Ponferrada heitir aftur á móti bær talsvert norðar á Spáni þar sem finna má ógrynni af fallegum köstulum, og þaðan er ættuð hin stórgóða hljómsveit Juniper Moon, sem nú er illu heilli hætt störfum.

Sveitin var stofnuð 1997 af Söndru (gítar og söngur), Dado (gítar), Jamie (bassi), Ivan (trommur) og Evu (hljómborð). Þau gáfu út þrjár smáskífur og eina breiðskífu undir merkjum hinnar virtu Elefant útgáfu, sem hefur á sínum snærum m.a. ljómandi gáfumennaindie eins og Camera Obscura og Trembling Blue Stars, sem og Lucky Soul sem ég hef minnst á áður. Sveitin vakti nokkra athygli fyrir kröftugt pönkskotið gítarpopp og bæði John Peel og Steve Lamacq útvarpsfrömuðir hömpuðu bandinu, en þrátt fyrir það lögðu þau upp laupana árið 2005.

Eva og Ivan stofnuðu svo hljómsveitina Linda Guilala og gítarleikarinn Dado leikur nú í bandinu Sportbilly. Hvorugt bandið kemst hinsvegar í hálfkvisti við Juniper Moon.

[MP3] Juniper Moon - El Resto De Mi Vida 

Hér fylgir svo myndband við frábært lag sem heitir "Sólo una Sonrisa":

 

Nýtt vídeó með Manhattan Love Suicides

Stuðboltarnir í Manhattan Love Suicides hafa frumsýnt glænýtt myndband við lagið "Clusterfuck", sem er sannast sagna ekki fyrir viðkvæma, jafnvel mér fannst nóg um á köflum. Þau hafa greinilega mikið gaman af svokölluðum Exploitation myndum.

Sveitin gefur svo á næstunni út hvorki meira né minna en 27 laga plötu sem ber heitir Burnt Out Landscapes, en hún verður mikið til samansafn af þeim aragrúa smáskífna sem bandið hefur gefið út. Ameríska umslagið af plötunni gefur að líta hér til hliðar, en hún verður gefin út beggja vegna atlantsála, af Magic Marker í USA og Squirrel Records í UK. Gaman er svo að segja frá því að TMLS eiga sjálf og reka síðarnefnda fyrirtækið sem hefur pungað úr samtals 18 plötum af ýmsu tagi í gegnum tíðina.

[Myspace]

Myndbandið ógurlega:

[MP3] Tónleikar á morgun (föstudaginn 23 maí)

 Heljarinnar tónleikar verða á morgun á Sjö Níu 13, sem er haganlega staðsettur á Klapparstíg, steinkast frá Sirkus fyrir þá sem ekki vita. 500 kall inn.

[MP3] Hellvar - Give me Gold

[MP3] Thundercats - Strange Day

Þetta er skásta myndin sem ég fann af Klaus.

[MP3] Klaus - Into my Face

[MP3] The Hot Puppies

Á ferðalagi um London í desember síðastliðnum datt ég inn á þrælfína tónleika. Þeir voru haldnir í Notting Hill Arts Club, sem ég hélt að væri einhverskonar risastór listasafn með málverkasýningum og leikhús sal. Ég labbaði hinsvegar tvisvar sinnum framhjá staðnum í lemjandi rigningu þar til búðareigandi hinu megin við götuna benti mér á staðinn. Þetta reyndist þá vera ómerkt kjallarahola, lítið stærri en íbúðin mín.

Þarna komu fram Olympians, sem fóru mest megnis fyrir ofan garð og neðan hjá mér, Santa Dog sem er þrælfínt band sem ég skrifa um seinna, og The Hot Puppies, sem ég er í stuði fyrir akkúrat núna. Gaman að segja frá því líka að myndin hér að ofan er tekin á þessu giggi.

Bandið var stofnað árið 2000 í bænum Aberystwyth í Wales, en þau hafa nú flutt sig um set og gera út bandið frá Cardiff. Þau gáfu út einhverjar smáskífur og hituðu upp fyrir Art Brut (sem ég þekki ekki en ku vera merk sveit) á túr um Bretland. Útgáfan Fierce Panda (sem mig minnir að hafi átt þátt í úrkynjun Kolrössu Krókríðandi undir það seinasta) gaf út fyrstu plötu þeirra, Under The Crooked Moon, í júlí 2006, og enn þann dag í dag vex vegur þeirra og stutt virðist vera í að The Hot Puppies slái almennilega í gegn.

Ég varð mér út um plötuna þeirra þarna, og það sem meira er um vert, smáskífuna King of England sem er alveg hreint framúrskarandi. Það lag finn ég hinsvegar ekki sem MP3 download, en hérna eru tvö lög af breiðskífunni:

[MP3] The Hot Puppies - Green Eyeliner
[MP3] The Hot Puppies - Terry

Og myndband við lagið "The girl who was too beautiful":

Í kvöld á Organ, eina ferðina enn...

Það er aldrei tími til að skrifa rassgat af viti þessa dagana. En þetta er að gerast í kvöld og svo skemmtilega vill til að ég veit um MP3 til niðurhals með þessum listamönnum.

[MP3] Valgeir Sigurðsson - Evolution of Waters. Hann er í svipuðu ástandi og ég þarna á þessari mynd.

[MP3] Sam Amidon - Saro.